講到香港傳統盛事，點少得一年一度嘅長洲太平清醮呢！

長洲太平清醮發展至今已有過百年嘅歷史，原意係驅除瘟疫，潔淨社區，以保闔家平安。

已列為國家級非物質文化遺產嘅太平清醮慶祝活動非常之精彩，除咗有不同可愛小朋友裝扮成嘅古今人物，同埋企喺支架上「凌空飄起」嘅飄色會景巡遊，仲有緊張刺激嘅「搶包山」比賽，所以太平清醮又叫做「包山節」。

大家不妨跟家人一同到長洲親身感受呢個咁有特色嘅節慶活動，多啲了解香港本土習俗！再順便食個平安包，祈求一年平平安安！